മലപ്പുറം ജില്ലയിലെ വളാഞ്ചേരിക്ക് അടുത്ത് കൊച്ചി മംഗലാപുരം ഹൈവേയില്‍ കഞ്ഞിപ്പുര എന്ന സ്ഥലത്ത് നിന്നും ജുമാ മസ്ജിദിനോട് ചേര്‍ന്ന് വലത്തോട്ട് ഏകദേശം മൂന്ന് കിലോമീറ്റര്‍ ദൂരമുണ്ട് ഇവിടങ്ങളിലേക്ക്. വിശ്വകീര്‍ത്തി റൂട്ടിലൂടെ കഷ്ടിച്ച് ഒന്നര കിലോമീറ്റര്‍ പിന്നിട്ട് വിശ്വകീര്‍ത്തി എത്തുന്നതിന് മുന്‍പ് ഇടത്തോട്ട് ക്രഷര്‍ റൂട്ടില്‍ ഒരു കിലോമീറ്റര്‍ പിന്നിട്ടാല്‍. പ്രകൃതി രമണീയമായ കല്യാണ ഒറുവില് ചെന്നെത്താം.
വളാഞ്ചേരി മുന്‍സിപ്പാലിറ്റിയിലെ ഒന്നാം ഡിവിഷന്‍ പെട്ട സ്ഥലങ്ങളാണ്, മറ്റൊരു വഴി കാടാമ്പുഴയില്‍ നിന്നും കഞ്ഞിപ്പുര റൂട്ടില്‍ തോണിക്കല്‍ എന്ന സ്ഥലത്ത് നിന്നും ഇടത്തോട്ട് സഞ്ചരിച്ചാല്‍ ഇവിടങ്ങളില്‍ എത്തിച്ചേരാം. മണ്‍സൂണില്‍ ആറുമാസക്കാലം തുടര്‍ച്ചയായി ഒരു ഉറവയില്‍ നിന്ന് ഒഴുകി തൊഴുവാനൂര്‍ ദേശങ്ങളിലെ തോട്ടിലൂടെ, ചങ്ങമ്പള്ളിയെ തഴുകി കാട്ടിപ്പരുത്തി വില്ലേജിലെ വിവിധങ്ങളായ സ്ഥലങ്ങളിലേക്ക് വെള്ളം പോകുന്ന വളരെ പ്രധാനപ്പെട്ട നിരുറവയാണ് കല്യാണ ഒറു.
കല്യാണ ഒറു വില്‍ ചെറുതും വലുതുമായ നിറയെ നീരുറവകളും ചെറു തോടുകളും കൊണ്ട് സമ്പന്നമായ ഒരിടം.വേനലില്‍ നിലയ്ക്കാത്ത നീരുറവകളും ധാരാളം ഉണ്ട്. കല്യാണ ഒറുവിനെ ചുറ്റി വയലുകളും ചെറിയ തോതില്‍ കാട് മൂടിക്കിടക്കുന്ന സ്ഥലങ്ങളും ഈ കാടുകള്‍ക്കിടയിലൂടെ ഒഴുകുന്ന അതിമനോഹരമായ തോടുകളും ഉള്ള ഒരിടമാണ് കല്യാണ ഒറു.
പക്ഷി മൃഗാധികള്‍ കൊണ്ട് വനസംഗീതം തീര്‍ത്ത ഒരിടം….മടുപ്പ് തോന്നില്ല എത്ര നേരം വേണമെങ്കിലും ഇവിടെ ചിലവഴിക്കുമ്പോള്‍, സന്ദര്‍ശകന്‍ ഒരു പക്ഷി സങ്കേതത്തില്‍ പോയ ഫീല്‍ ഇവിടെ നിന്നും അനുഭവപ്പെടും. പരിസര പ്രദേശങ്ങളില്‍ ആള്‍താമസം ഉള്ളതും എന്നാല്‍ കരിങ്കല്‍ കോറികളാല്‍ മഴക്കാല വെള്ളച്ചാട്ടങ്ങള്‍ കൊണ്ട് പ്രസിദ്ധവുമാണ്, വെള്ളച്ചാട്ടവും കോറികളിലെ കൊച്ചു തടാകങ്ങളും ഏതു വേനലിനെയും അതിജീവിക്കുന്നവയുമാണ്.
നിലവില്‍ പ്രവര്‍ത്തന ക്ഷമമായ കോറികള്‍ രണ്ടെണ്ണം മാത്രമേ നിലവിലൊള്ളൂ ബാക്കിയെല്ലാം വേനലിനെ സമൃതമാക്കുന്ന ജല സംഭരണി പോലെ ഉപയോഗ ശൂന്യമായി നിലകൊള്ളുകയാണ്. വര്‍ഷങ്ങള്‍ക്കു മുന്‍പ് ഈ നീരുറവയെ ആശ്രയിച്ചു ഇവിടുത്തുകാര്‍ കാര്‍ഷിക വൃത്തിക്ക് ജലസേചനം നടത്തിയിരുന്നത് ഈ കല്യാണ ഒറുവിലെ ജലം ഉപയോഗിച്ചായിരുന്നു.
വട്ടപ്പാറ വളവില്‍ നിന്നും കീഴ്‌പ്പോട്ട് പോകുന്ന റോട്ടിലൂടെ കുറച്ച് ദൂരം സഞ്ചരിച്ചാല്‍ വടക്കേ കുളമ്പ് എന്ന സ്ഥലത്ത് വര്‍ഷങ്ങള്‍ക്കു മുന്‍പ് ഇതിനൊരു തടയണ പണിതിട്ടുണ്ടായിരുന്നു മഴക്കാലത്ത് ഈ തടയണയില്‍ കുട്ടികള്‍ ചാടിക്കുളിക്കുന്നത് സ്ഥിരം കാഴ്ചകളാണ്.
താണിയപ്പന്‍കുന്നിനു മുകളിലെ നീരുറവകള്‍ സംഗമിച്ച് വടക്കേക്കുളമ്പ്, ചീരാനി ഭാഗത്തേക്ക് ഒഴുകിയെത്തി താഴെ കാവുംപുറംതോട്ടില്‍ (വട്ടപ്പാറ വളവിനും കാവുംമ്പുറത്തിനും ഇടക്ക് ഹൈ വേയില്‍ കാണുന്ന ) ചേരുന്ന കല്യാണ ഒറുവിലെ ജലം ഒഴുകികൊണ്ടിരിക്കുന്നു . കല്യാണ ഒറുവില് നിന്നും ഒഴുകി വരുന്ന ജലം തോട്ടില്‍ ചിറ കെട്ടി ജലസേചനം നടത്തിയതിന്റെ തിരുശേഷിപ്പുകള്‍ ഇന്നും അവിടെ കാണാനാകും.
ഈ തോടിന് ഇരുവശവും കൃഷിയിടങ്ങളുണ്ട് മേഖലയിലെ നൂറുകണക്കിനു ഏക്കര്‍ കൃഷിയിടങ്ങള്‍ക്ക് അണ മുന്‍പ് പ്രയോജനകരമായിരുന്നു.
തോടിനോട് ഓരം ചേര്‍ന്ന് നില്‍ക്കുന്ന വയലുകളും കാലികളും എന്തിനേറെ ഗ്രാമങ്ങളുടെ ഗ്രാമീണ ഭംഗിയും ഇന്നും ഇവിടങ്ങളില്‍ കാണാന്‍ കഴിയും. ഗൃഹാതുരുത്വം ഉണര്‍ത്തുന്ന ഗ്രാമീണ കാഴ്ച്ചകളുടെ വശ്യസൗന്ദര്യം കല്യാണ ഒറു ഒഴുകുന്ന തീരങ്ങളില്‍ ഇന്നും പച്ചപിടിച്ച് നില്‍പ്പുണ്ട്.
മയില്‍… കാട്ട് കോഴി….തത്ത കുരുവികള്‍….കുരങ്..കുറുനരി.. കാട്ടുപൂച്ച .. ചിത്ര ശലഭങ്ങള്‍.. പെരുമ്പാമ്പ് … തുടങ്ങിയ പക്ഷികളും,മൃഗങ്ങളും ഉരഗങ്ങളും, സസ്തനികളുടെയും വാസ സ്ഥലങ്ങളാണിവിടങ്ങളില്‍ . ശരിക്കും ഇവിടെ ഒരു ചെറിയ കാടിന്റെ മൂകതയും വന സൗന്ദര്യവും ആസ്വദിക്കാന്‍ കഴിയും, കാനന പാതകളും കരിങ്കല്‍ കോറികളും ഇവിടെ കാണാനിടയാകും.
”’ കാട് തേടി അകലങ്ങളിലേക്ക് പോകേണ്ടതില്ല ! ഗ്രാമീണ കാഴ്ചകള്‍ തേടി അലയേണ്ടതില്ല !. എല്ലാം ഈ പ്രദേശങ്ങളിലുണ്ട് ” ഇതിനോട് അടുത്ത് കിടക്കുന്ന മറ്റൊരു സ്ഥലമാണ് കല്യാണ ഒറുവിലെ കരിങ്കല്‍ കോറിയിലെ നീല തടാകം.. ഏതു വേനലിലും വറ്റാത്ത ജലമാണ് ഈ തടാകത്തിന്റ സവിശേഷത. വിദൂരതയില്‍ നിന്നുമല്ലാതെ ഒട്ടനവധി ജനങ്ങള്‍ മഴക്കാലത്തും വേനലിലും ഇവിടേക്ക് കുളിക്കാന്‍ വരുന്നത് പതിവ് കാഴ്ചയാണ് .
ഈ തടാകത്തിലെ മറ്റൊരു പ്രത്യേകത ധാരാളം ചെറിയ ചെറിയ കല്ലേരി മീനുകള്‍ ഉണ്ട്, ചിലരുടെ പ്രധാന ഹോബി വെള്ളത്തില്‍ കാല്‍ മുക്കി വെച്ച് മീനുകളെ കൊണ്ട് മസാജ് ചെയ്യിപ്പിക്കുന്നത് കാണാം, ഇതിനായി ഇങ്ങോട്ട് വരുന്നവരുടെ എണ്ണവും അടുത്തകാലത്തായി ക്രമാതീതമായ് വര്‍ദ്ധിച്ചു വരുന്നുണ്ട്. ഈ കോറിയില്‍ തന്നെ മഴക്കാലമായാല്‍ പാറമടയ്ക്ക് 40 അടി മുകളില്‍ നിന്നും ആഴ്ന്നിറങ്ങുന്ന അതി മനോഹരമായ വെള്ളച്ചാട്ടവും ഉണ്ട്. അവധി ദിനങ്ങള്‍ ആഘോഷമാക്കാന്‍ നിരവധി പേര്‍ ഇവിടേക്ക് വരുന്നുണ്ട്.
ഒഴുകാം പാറയും കല്യാണ ഒറുവും ഇവക്ക് അടുത്ത് കിടക്കുന്ന കൊറികളില്‍ നിന്നും വരുന്ന ഇവയിലെയെല്ലാം നീരുറവയെ പ്രകൃതിക്ക് യാതൊരു ഭംഗവും വരുത്താത്ത രീതിയില്‍ സംരക്ഷിച്ച് പുതിയ തടയണ പോലെുള്ളവ നിര്‍മ്മിച്ചാല്‍ ഈ പ്രദേശങ്ങളിലെ കുടിവെള്ള ക്ഷാമത്തിനും കാര്‍ഷികേതര ആവശ്യങ്ങള്‍ക്കും ഉപയോഗിക്കാന്‍ പരുവത്തില്‍ മാറ്റേണ്ടതിന് മാറി മാറി വരുന്ന ഭരണഘൂടങ്ങള്‍ മുന്‍കൈ എടുക്കേണ്ടാതായിട്ടുണ്ട്. കൂടാതെ ടൂറിസം സാധ്യത ഏറെയുള്ള പ്രദേശം കൂടിയാണ്. മഴക്കാലത്ത് വെള്ളച്ചാട്ടം കാണുന്നതിന് വിവിധ പ്രദേശങ്ങളില്‍ നിന്നും നിരവധി ആളുകള്‍ വരുന്ന സ്ഥലം കൂടിയാണ്.
യാത്ര യോഗ്യമായ പാതകളും എന്നാല്‍ ഹൈവേയില്‍ നിന്ന് അതി വിദൂരത്തല്ലാത്ത ഒരു ഉള്‍ പ്രദേശം കൂടിയാണ് കല്യാണ ഒറു.
ഇവിടം സന്ദര്‍ശിക്കാന്‍ അനുയോജ്യമായ സമയം ജൂണ്‍ മുതല്‍ ആഗസ്റ്റ് വരെയാണ്, ഈ സമയങ്ങളില്‍ വെള്ളച്ചാട്ടവും നീരൊഴുക്കും ധാരാളം ഇവിടങ്ങളില്‍ കാണാന്‍ കഴിയും, ബാക്കി സമയങ്ങളില്‍ കോറികളിലെ വിനോദം മാത്രമേ സാധ്യമാവുകയൊള്ളു..
‘ കല്യാണ ഒറുവും ഒഴുക്കാന്‍ പാറയുമെല്ലാം മഴക്കാല സുന്ദരികളാണ്, മഴ കനിഞ്ഞു നല്‍കിയ പ്രകൃതിയിലെ ചില അത്ഭുത പ്രതിഭാസങ്ങളില്‍ ഒന്ന് മാത്രമാണ് ഇവയെല്ലാം ‘. ? .മുറ്റത്തെ മുല്ലക്ക് മണമില്ല എന്ന് പറയും പോലെ നമുക്ക് ചുറ്റിലും നമ്മുടെ കാല്‍ കീഴില്‍ പ്രകൃതി ഒരുക്കിവെച്ച നിരവധി പ്രതിഭാസങ്ങളൊന്നും കാണാതെ ഇല്ലാത്ത കാശും സമയവും ഉണ്ടാക്കി അകലങ്ങളിലെ പ്രകൃതി നുണയാന്‍ പോകുന്ന നാമെത്ര…….വിഡ്ഢികള്‍.
എന്‍ബി : പ്രിയ യാത്രികരെ ഒരു നിമിഷം
ക്വാറികളില്‍ കുളിക്കുന്നവര്‍ അവിടുത്തെ ജോലിക്കാരുടെ മുന്നറിയിപ്പും നിര്‍ദേശങ്ങളും പാലിക്കുക . അപകടം വിളിച്ചു വരുത്താതിരിക്കുക
*** പ്ലാസ്റ്റിക് കവറുകളും ബോട്ടിലുകളും വലിച്ചെറിയാതിരിക്കുക
*** പ്രകൃതിയെ അതിന്റെ തന്‍മയത്വത്തോടെ നില നിര്‍ത്തുക, ഓര്‍ക്കുക നമുക്ക് മുമ്പ് സഞ്ചരിച്ചവര്‍ നമ്മളിലേക്ക് കൈമാറ്റം ചെയ്യപ്പെട്ടതിനെ അതെ പടി നമുക്ക് കൈമാറേണ്ടതുണ്ട് .
റൂട്ട് : തൃശ്ശൂര്‍ നിന്നും 68 കിലോമീറ്റര്‍. കോഴിക്കോട് നിന്ന് 62 കിലോമീറ്റര്‍,
മലപ്പുറത്ത് നിന്നും 27 കിലോമീറ്റര്‍.
വളാഞ്ചേരിയില്‍ നിന്നും 8 കിലോമീറ്റര്‍.
COMMENTS