അഖില്‍ സുരേന്ദ്രന്‍ അഞ്ചല്‍
മലമേല്‍ എന്ന പ്രദേശം സംസ്ഥാന വിനോദസഞ്ചാര വകുപ്പ് പ്രകൃതി സൗഹൃദ ടൂറിസം മേഖലയായി പ്രഖ്യാപിച്ചിരിക്കുന്നു .വിനോദ സഞ്ചാര വികസനത്തിന് ഏറെ സാധ്യതകളുള്ള കിഴക്കന്‍ മേഖലയിലെ ഏറ്റവും പ്രകൃതി രമണീയമായ പ്രദേശങ്ങളിലൊന്നാണ് മലമേല്‍ പാറ എന്ന് പറയാം . ഐതീഹ്യ പ്രാധാന്യം കൊണ്ടും ദൃശ്യ ചാരുത കൊണ്ടും ചരിത്രപ്പെരുമ കൊണ്ടും ധാരാളം സഞ്ചാരികളെ ആകര്‍ഷിക്കുന്ന പ്രദേശമായി മാറിക്കഴിഞ്ഞു ഇന്ന് മലമേല്‍ പാറ . ഒരു കാലത്ത് പാറ ലോബികള്‍ ആര്‍ത്തിയോടെ പാഞ്ഞടുത്ത മലനിരകള്‍. തുരന്നു തുരന്നു നാടിന്റെ ആത്മാവ് തന്നെ കുളം തോണ്ടു മെന്നായപ്പോള്‍ നാടാകെ ഇളകി, നാട്ടുകാര്‍ സമര രംഗത്തിറങ്ങി. പാറ ഖനനം പൂര്‍ണ്ണമായും നിലച്ചതോടെ കൊല്ലം ജില്ലയിലെ മലമേല്‍ പാറ മികച്ച ടൂറിസം സാധ്യതയാണ് ഇപ്പോള്‍ മുന്നോട്ടു വെയ്ക്കുന്നത് . ആ പാറ വഴികളിലൂടെ ഒരു യാത്ര.
ത്രിമൂര്‍ത്തികളുടെ സംഗമ സ്ഥാനമെന്നനിലയില്‍ പ്രസിദ്ധമായ ശങ്കരനാരായണ ക്ഷേത്രം മലമേല്‍ പാറയില്‍ ആണ് സ്ഥിതി ചെയ്യുന്നത് . ഈ ക്ഷേത്ര ചൈതന്യം തന്നെയാണ് മലമേല്‍ പാറയെ ഇത്രയും പ്രശസ്തിയുടെ കൊടുമുടിയില്‍ എത്തിച്ചിരിക്കുന്നത് എന്ന് എടുത്ത് പറയണ്ടേ കാര്യം തന്നെയാണ് . പഴയ കാല നാടുകാണിപ്പാറയ്ക്ക് ഇടയ്ക്ക് ഇടുങ്ങിയ ഗുഹ പോലെ ഒരു ദ്വാരം. പാറക്കൂട്ടങ്ങള്‍ക്കിടയിലൂടെ മൃഗങ്ങളുടെ സഞ്ചാരത്തിനു പ്രകൃതി കനിവോടെ അളന്നു നല്‍കിയ വഴിത്താര. പരുക്കന്‍ പാറകളില്‍ അള്ളിപ്പിടിച്ചും നൂഴ്ന്നിറങ്ങിയും മുന്നോട്ടുപോകുമ്പോള്‍ ഏതു ധൈര്യശാലിയുടെയും ശ്വാസം ഒരുവേള നിലച്ചേക്കാം. എന്റ്റേയും ശ്വാസം നിലച്ചിരുന്നു.
വെഡിങ് ഷൂട്ടുകളിലും മറ്റ് സീരിയല്‍ , ആല്‍ബം , സിനിമ ഷൂട്ടിങ്ങളും മലമേല്‍ പാറയില്‍ വെച്ച് ധാരാളം ചിത്രീകരിച്ചിട്ടുണ്ട് . അതില്‍ ഞാന്‍ കണ്ടിട്ടുള്ളതും എനിക്ക് അറിയാവുന്നതും ആയ വിഡിയോ അഞ്ചലിലെ പ്രയാദ് സ്റ്റുഡിയോയുടെ വെഡിങ് ആല്‍ബം ആണ്. ഫോട്ടോഗ്രാഫര്‍ സ്റ്റാലിന്‍ ജെറോം ചേട്ടന്‍ വളരെ മനോഹരമായി ആണ് മലമേല്‍ പാറ ചിത്രീകരിച്ചിരിക്കുന്നത് എന്ന് കാണാം .പാറകളുടെ വിടവിലായി കാണാം, പുലിച്ചാണ്‍. പുലിയുടെ താവളം. ഉള്ളിലേക്കു തലയൊന്നു നീട്ടി നോക്കൂ, പഴക്കമേറെച്ചെന്ന ചൂര് മണക്കുന്നു. മനുഷ്യന്റെ കടന്നു വരവിനു മുമ്പ് പുലി അടക്കം വന്യമൃഗങ്ങള്‍ മലമടക്കുകള്‍ താവളമാക്കിയിട്ടുണ്ടാകാം.
പാറക്കൂട്ടങ്ങള്‍ പിന്നിട്ടു നാടുകാണിപ്പാറയ്ക്കു മുകളിലെത്തുമ്പോള്‍ ചന്ദനക്കാറ്റ് ചുറ്റി വീശുന്നതിനാല്‍ ക്ഷീണമെല്ലാം അതോടെ നമ്മുടെ അകലും. പാറക്കൂട്ടങ്ങള്‍ക്കു ചാരെ ചന്ദനമരങ്ങള്‍ സമൃദ്ധമായി വളരുന്നു. പുല്‍ത്തൈലത്തിന്റെ നറുമണം തൂകുന്ന ഇഞ്ചപ്പുല്ല് മേടുകളോളം വളര്‍ന്നു നില്‍ക്കുന്നു. സമീപം കൂറ്റന്‍ ഏഴിലംപാലയും കാണാം . അതിന്റെ ചുവട്ടില്‍ ഇഞ്ചപ്പുല്ലിന്റെ നാമ്പുകള്‍ പൊട്ടിച്ചു മണപ്പിച്ച് അല്‍പനേരം ഇരിക്കാം. ഭൂമിയും ആകാശവും തൊട്ടു തൊട്ടു നില്‍ക്കുന്ന മലമേല്‍ ഗ്രാമ പ്രദേശങ്ങള്‍ തരുന്ന പ്രകൃതിയുടെ ദൃശ്യ ഭംഗി അത് എന്റെ സഞ്ചാരി സ്‌നേഹിതര്‍ ഇവിടെ വന്ന് അനുഭവിച്ച് അറിയുക .ഞാന്‍ പറഞ്ഞ് തരില്ല . മല മേല്‍ വാ ആവോളം പ്രകൃതി ഭംഗി ആസ്വദിക്കാം .
തിരുവിതാംകൂര്‍ ദേവസ്വം ബോര്‍ഡിനു കീഴിലുള്ള ക്ഷേത്രമാണ് , മലമേല്‍ ശങ്കരനാരായണ ക്ഷേത്രം ഗ്രാമത്തിന്റെ മുഖശ്രീ തന്നെ ഈ ക്ഷേത്രത്തിന്റെയും ദേവന്‍മാരുടെയും ചൈതന്യത്തിലാണ് എന്ന് ഞാന്‍ വീണ്ടും എടുത്ത് പറയുന്നു . നടപ്പാറയിലെമ്പാടും ഇഞ്ചിപ്പുല്ല്. ഇവിടെ നിന്നു നാടുകാണിപ്പാറയിലേക്കു യാത്ര സാഹസികം. നാടുകാണിപ്പാറയ്ക്കു മുകളില്‍ നിന്നാല്‍ തങ്കശേരി വിളക്കുമരം കാണാം. ചടയമംഗലം ജടായുപ്പാറയും, മരുതിമലയും തലയെടുപ്പോടെ നില്‍ക്കുന്നത് കാണാവുന്നതാണ് . നാടുകാണിപ്പാറയില്‍ നേരത്തെ പൊലീസിന്റെ വയര്‍ലെസ് സ്റ്റേഷന്‍ ഉണ്ടായിരുന്നു. മിന്നലേറ്റ് അതു കത്തിപ്പോയി. കെട്ടിടം ഇപ്പോഴും ഇവിടെ അവശേഷിക്കുന്നു.
മലമേല്‍ പരിസ്ഥിതി സംരക്ഷണ വേദി, പരിസ്ഥിതി സംരക്ഷണ ഏകോപന സമിതി, കൊല്ലം ജില്ലാ പരിസ്ഥിതി സംരക്ഷണ ഏകോപന സമിതി, മലമേല്‍ പൗരസമിതി, അറയ്ക്കല്‍ ദേവീക്ഷേത്ര ഉപദേശക സമിതി, കേരള ട്രസ്റ്റ് ദേവസ്വം കോണ്‍ഫെഡറേഷന്‍, കേരള ഗാന്ധിയന്‍ സാംസ്‌കാരികവേദി, മലമേല്‍ വേലുത്തമ്പി സ്മാരക വായനശാല തുടങ്ങിയ സംഘടനകളുടെ നേതൃത്വത്തില്‍ നടത്തിയ സമരങ്ങള്‍ക്കും നിയമ പോരാട്ടങ്ങള്‍ക്കും ഒടുവിലാണ് പാറഖനനം നിര്‍ത്തിവച്ചത് മലമേലില്‍ . ആയിരക്കണക്കിനു കുരങ്ങന്മാര്‍ അധിവസിച്ചിരുന്നു ഇവിടെ. അവയില്‍ പലതും മലയിറങ്ങി. ഇപ്പോഴും അഞ്ഞൂറിലേറെ കുരങ്ങന്മാരുണ്ടെന്നു നാട്ടുകാര്‍ വാദിക്കുന്നു . ഈ പാറകളെ ബന്ധിപ്പിച്ചു സാഹസിക ടൂറിസം , ഇക്കോ ടൂറിസം, തീര്‍ഥാടന ടൂറിസം പദ്ധതികള്‍ ആവിഷ്‌കരിച്ചാല്‍ വിനോദസഞ്ചാരികള്‍ ഇങ്ങോട്ടേക്ക് ഒഴുകും. ഇപ്പോള്‍ തന്നെ നൂറുകണക്കിനു സഞ്ചാരികള്‍ വരുന്നുണ്ട്. മലനിരകള്‍ ഔഷധസസ്യങ്ങളുടെ കലവറയാണ്. ചന്ദനം, ഇഞ്ചിപ്പുല്ല് എന്നിവയ്ക്കു പുറമെ കറുക, കൂവളം, കാഞ്ഞിരം, ദന്തപ്പാല, കടുവപ്പാല, കുടപ്പാല, നറുനണ്ടി, അമൃത്, പേരാല്‍, അരയാല്‍ തുടങ്ങിയവയും തിങ്ങി വളരുന്നത് നമ്മുക്ക് കാണാവുന്നതാണ് .
മലമേല്‍ മലനിരകളിലെപ്പോഴും ചന്ദനക്കാറ്റ് വീശും. മലനിരകളില്‍ ചന്ദനമരങ്ങള്‍ വ്യാപകമായി വളരുന്നു. മരങ്ങളുടെ സുഗന്ധം കാറ്റിലലിഞ്ഞ് പരിസരമെമ്പാടും പരക്കും ഗ്രാമത്തിന്റെ വിശുദ്ധി പോലെ. മറയൂര്‍ കഴിഞ്ഞാല്‍ ചന്ദനമരങ്ങള്‍ സ്വാഭാവികമായി വളരുന്ന ഏക പ്രദേശം ഇവിടമാണെന്നു നാട്ടുകാര്‍ പറയുന്നു. വനേതര പ്രദേശത്തു ചന്ദനം കൂടുതല്‍ വളരുന്ന ഏക പ്രദേശവും ഇതാകാം. ഇവിടത്തെ മണ്ണിന്റെ ജൈവസമ്പുഷ്ടിയും കാലാവസ്ഥയുടെ പ്രത്യേകതകളുമാകാം ചന്ദനം ഇത്രയേറെ വളരാന്‍ കാരണം. പുരാതനകാലം മുതല്‍ ചന്ദനമരങ്ങളുടെ കലവറയായിരുന്നു ഇവിടം. ഐതിഹ്യങ്ങളും പുരാണങ്ങളും ഇടകലരുന്ന ഇവിടെത്തെ അക്കഥകള്‍ക്കുമുണ്ട് ചന്ദനത്തിന്റെ സുഗന്ധം.
മലമേലില്‍ പാറയില്‍ എത്താന്‍
കൊല്ലം നഗരത്തില്‍ നിന്ന് ഏകദേശം 42 കിലോമീറ്റര്‍ അകലെയാണ് മലമേല്‍ പാറ സ്ഥിതി ചെയ്യുന്നത്. കൊല്ലത്തു നിന്നു കൊട്ടാരക്കര വഴി വാളകത്തെത്തി അവിടെ നിന്നു കെ എസ് ആര്‍ ടി സി സ്വകാര്യ ബസുകളില്‍ കയറി മലമേല്‍ എത്താം. കൊല്ലത്തു നിന്നു മറ്റു മാര്‍ഗമാണെങ്കില്‍ അഞ്ചലിലെത്തി അവിടെ നിന്ന് ഏറം, തടിക്കാട് വഴിയും എത്താം. അഞ്ചല്‍ ആയൂര്‍ റോഡിലെ പനച്ചവിളയില്‍ നിന്നും മലമേലില്‍ എത്താം. എംസി റോഡ് വഴി വരുന്നവര്‍ക്ക് വാളകം വഴിയും മലമേല്‍ പാറയില്‍ എത്തിചേരാവുന്നതാണ് .
COMMENTS